കാസർകോട്: ജില്ലയുടെ മലയോര ഗ്രാമമായ വെസ്റ്റ്‌ എളേരി നാട്ടക്കൽ എ. എൽ. പി. സ്കൂളിൽ ഈ അധ്യയന വർഷവും അവസാനിക്കുന്നത് ഇരട്ടക്കുട്ടിക്കൂട്ടങ്ങളുടെ കളിചിരിയോടെ. ഈ വിദ്യാലയത്തിൽ രണ്ടിലും നാലിലും ഇരട്ടകൾ നാലാണ്.
ചീർക്കയത്തെ സുധീഷ് -അശ്വനി ദമ്പതികളുടെ മക്കളായ ജഗൻ നാഥും ജഗൻ ദേവുമാണ് രണ്ടാം ക്ലാസിലെ ഇരട്ട ആൺ കുട്ടികൾ.ഇതേ ക്ലാസിൽ മുടന്തേൻ പാറയിലെ ബിജു -കാർത്തിക ദമ്പതികളുടെ മക്കളായ നിവേദയും നിവേദ്യയും ഇരട്ടപെൺ കുട്ടികളായുണ്ട്.
നാലാം ക്ലാസിൽ അടുക്കളക്കണ്ടത്തെ അശോക് കുമാർ -സനു ദമ്പതികളുടെ ഇരട്ട ആൺ കുട്ടികളായ ദേവ നാഥും ദേവ ദർശുമാണ് ഇരട്ടകൾ. മാലോം പടയം കല്ലിലെ സുഭാഷ് -ശ്രീദേവി ദമ്പതികളുടെ മക്കളായ വിനായകും വിഘ്‌നേഷും ആൺ ഇരട്ടകളായി പഠിക്കുന്നു. എട്ടു പേരും പാഠ്യ, പാഠ്യേതര മികവ് പുലർത്തുന്നവരെന്ന് അധ്യാപകരുടെ സാക്ഷ്യം.
