സ്വന്തം ലേഖകന്‍
ബംഗളുരു: മഹാകവി ഉള്ളൂര്‍ എസ്. പരമേശ്വരയ്യരുടെ ഉമാകേരളം മഹാകാവ്യം കന്നഡയില്‍. കര്‍നാടക സര്‍കാരിന്റെ വിവര്‍ത്തന അതോറിറ്റി ‘കുവെമ്പു ഭാഷാ ഭാരതി’ക്കു വേണ്ടി പത്രപ്രവര്‍ത്തകന്‍ വിക്രം കാന്തികൈരയാണ് വിവര്‍ത്തനം നിര്‍വഹിച്ചിരിക്കുന്നത്.
1877-1949 കാലയാളവില്‍ ജീവിച്ചിരുന്ന ഉള്ളൂരിന്റെ ഇരുപതോളം കൃതികളില്‍ ഏറ്റവും ശ്രദ്ധേയമായതാണ് ഉമാകേരളം. 19 സര്‍ഗങ്ങളും രണ്ടായിരത്തില്‍ പരം ശ്ലോകങ്ങളും ഇതിലുണ്ട്. ഒമ്പതാം നൂറ്റാണ്ടിലെ മധ്യത്തില്‍ വേണാട് ഭരിച്ചിരുന്ന ആദിത്യ വര്‍മയുടെ കൊലയ്ക്ക് ശേഷം നാടിനെ രക്ഷിച്ച ഉമയമ്മ റാണിയുടെ ഭരണനൈപുണ്യവും ധീരതയും സാഹസികമായ ജീവിതവുമാണ് ഇതിലെ ഇതിവൃത്തം. ആദിത്യ വര്‍മയുടെ മകള്‍ കല്യാണിയും മന്ത്രി രവി വര്‍മ്മയും തമ്മിലുള്ള അനുരാഗവം കഥയ്ക്ക് രസം പകരുന്ന ഘടകമാണ്.
കാസറഗോഡ് രാംദാസ് നഗറിലേ കാന്തികെരെ സ്വദേശിയായ വിക്രം മലയാളത്തില്‍ ഒ. കെ. ജോണി എഴുതിയ ‘കാവേരിയോടൊപ്പം എന്റെ യാത്രകള്‍’ കന്നഡയിലേക്ക് വിവര്‍ത്തനം ചെയ്തിട്ടുണ്ട്. ഇതിന്റെ രണ്ടാം പതിപ്പ് ഈയിടെ പുറത്തിറങ്ങി. ചെറുകഥകളും കവിതകളും മൊഴിമാറ്റം ചെയ്തിട്ടുണ്ട്. ക്യൂബന്‍ യാത്രാ വിവരണം കന്നഡയില്‍ നിന്നു മലയാളത്തിലേക്ക് വിവര്‍ത്തനം ചെയ്യുകയാണിപ്പോള്‍.
പ്രജാവാണി ദിനപത്രത്തിന്റെ സബ് എഡിറ്ററായും റിപ്പോര്‍ട്ടറായും പ്രവര്‍ത്തിക്കുന്നു. മൈസൂര്‍, ഹുബ്ബള്ളി, ബെംഗളൂരു, മംഗളൂരു എന്നിവിടങ്ങളില്‍ ജോലി ചെയ്തിട്ടുണ്ട്. കര്‍നാടക മാധ്യമ അക്കാദമി, ചരക, റോട്ടറി മിഡ് ടൌണ്‍, കര്‍നാടക സംസ്ഥാന ജേര്‍ണലിസ്റ്റ് അസോസിയേഷന്‍, മൈസൂര്‍ ജില്ലാ ജേര്‍ണലിസ്റ്റ് അസോസിയേഷന്‍ അവാര്‍ഡുകള്‍ ലഭിച്ചിട്ടുണ്ട്.
