കോഴിക്കോട്: സംസ്ഥാന മനുഷ്യാവകാശ കമ്മീഷന്‍ ജുഡീഷ്യല്‍ അംഗം കെ. ബൈജുനാഥിന്റെ നേതൃത്വത്തില്‍ കലക്ടറേറ്റ് കോണ്‍ഫറന്‍സ് ഹാളില്‍ നടത്തിയ സിറ്റിങ്ങില്‍ 63 കേസുകള്‍ പരിഗണിച്ചു. 26 എണ്ണം തീര്‍പ്പാക്കി. അടുത്ത സിറ്റിങ് മാര്‍ച്ച് 30 ന് നടത്തും.
വടകരയിലെ നാര്‍ക്കോട്ടിക് വിഷയമുള്‍പ്പെടെ വിവിധ വിഷയങ്ങള്‍ കമ്മീഷനു മുന്‍പാകെ വന്നു. ലഹരി മാരക വിപത്താണെന്നും ലഹരി മാഫിയ ഒരു തലമുറയെ തന്നെ നശിപ്പിക്കുമെന്നും ലഹരിയെ കുറിച്ചുള്ള ബോധവല്‍ക്കരണം കുടുംബങ്ങളില്‍ നിന്ന് തുടങ്ങണമെന്നും കമ്മീഷന്‍ ജുഡീഷ്യല്‍ അംഗം പറഞ്ഞു. സ്‌കൂള്‍, കോളേജ്, ആശുപത്രി തലങ്ങളില്‍ ജാഗ്രത സമിതികള്‍ വിപുലപ്പെടുത്തേണ്ടതുണ്ടെന്നും കമ്മീഷന്‍ അഭിപ്രായപ്പെട്ടു.
