കോഴിക്കോട്: എസ്.എസ്.എല്‍.സി പരീക്ഷ ആരംഭിക്കുമ്പോള്‍ സംസ്ഥാനത്ത് ചൂട് കൂടി വരികയാണ്. 42 ഡിഗ്രി സെല്‍ഷ്യസ് വരെ ചിലയിടങ്ങളില്‍ ചൂട് അനുഭവപ്പെടുന്നുണ്ട്. ഈ സാഹചര്യത്തില്‍ പരീക്ഷാഹാളില്‍ കുട്ടികള്‍ ആവശ്യപ്പെട്ടാല്‍ കുടിവെള്ളം നല്‍കും. ഇതിനായി സംവിധാനമൊരുക്കിയതായി അധികൃതര്‍ അറിയിച്ചു. ഇതുമായി ബന്ധപ്പെട്ട് എല്ലാ സ്‌കൂളുകള്‍ക്കും നിര്‍ദേശം നല്‍കിയതായി വിദ്യാഭ്യാസ ഡെപ്യൂട്ടി ഡയറക്ടര്‍ ഇ.സി മനോജ്കുമാര്‍ പറഞ്ഞു.
ആവശ്യമുള്ള കുട്ടികള്‍ക്ക് വെള്ളം കൊണ്ടുവരാനും അനുമതിയുണ്ട്. ഡി.ഡി.ഇ ഓഫീസുകള്‍ കേന്ദ്രീകരിച്ച് ഹെല്‍പ് ഡെസ്‌ക് ഒമ്പതിന് തുടങ്ങും. അധ്യാപകരുടെ ഡ്യൂട്ടി, ചോദ്യപേപ്പര്‍ വിതരണം എന്നിവ ഇവിടെനിന്ന് നിരീക്ഷിക്കും. മറ്റ് സഹായങ്ങളും നല്‍കും. കുട്ടികള്‍ക്ക് ആത്മവിശ്വാസത്തോടെ പരീക്ഷ എഴുതാനുള്ള സാഹചര്യം ഒരുക്കും.
