കോഴിക്കോട്: ഡിസ്ട്രിക്ട് കലക്ടര്‍ ഇന്റേണ്‍ഷിപ്പ് പ്രോഗ്രാമിന്റെ (ഡി സി ഐ പി ) ഇരുപത്തിമൂന്നാം ബാച്ചിലെ ഇന്റേണ്‍സിന് ജില്ലാ കലക്ടര്‍ ഡോ.എന്‍.തേജ് ലോഹിത് റെഡ്ഡി സര്‍ട്ടിഫിക്കറ്റ് വിതരണം ചെയ്തു. 4 മാസത്തെ ഇന്റേണ്‍ഷിപ്പ് പൂര്‍ത്തിയാക്കിയ13 പേര്‍ക്കാണ് സര്‍ട്ടിഫിക്കറ്റുകള്‍ വിതരണം ചെയ്തത്.
ജില്ലാ ഭരണകൂടത്തോടൊപ്പം ജില്ലയിലെ വിവിധ വികസന, സാമൂഹ്യക്ഷേമ പദ്ധതികളില്‍ പ്രവര്‍ത്തിക്കാന്‍ അവസരമൊരുക്കുന്ന ജില്ലാ കലക്ടറുടെ ഇന്റേണ്‍ഷിപ്പ് പ്രോഗ്രാം വിജയകരമായി പൂര്‍ത്തീകരിച്ചാണ് ഇവര്‍ സര്‍ട്ടിഫിക്കറ്റിന് അര്‍ഹരായത്.
പൊതുഭരണ സംവിധാനങ്ങളെ അടുത്തറിയാന്‍ അവസരം നല്‍കികൊണ്ട് സര്‍ക്കാര്‍ പദ്ധതികളിലും വികസന പരിപാടികളിലും പദ്ധതി ആസൂത്രണഘട്ടം മുതല്‍ തന്നെ സജീവ യുവജന പങ്കാളിത്തം ഉറപ്പുവരുത്തി കൂടുതല്‍ കാലികവും ക്രിയാത്മകവുമായ മുന്നേറ്റം സാധ്യമാക്കുക എന്നതാണ് പരിപാടിയിലൂടെ ലക്ഷ്യമിടുന്നത്.
