ആലപ്പുഴ: അര്‍ത്തുങ്കലില്‍ കടലില്‍ കുളിക്കാനിറങ്ങി കാണാതായ വിദ്യാര്‍ഥികളില്‍ രണ്ടാമത്തെയാളുടെ മൃതദേഹവും കിട്ടി. ചേര്‍ത്തല കടക്കരപ്പള്ളി നികര്‍ത്തില്‍ മുരളീധരന്റെ മകന്‍ ശ്രീഹരിയുടെ മൃതദേഹമാണ് കണ്ടെത്തിയത്. മൃതദേഹം ഇന്നു രാവിലെ അര്‍ത്തുങ്കലിനു സമീപം ചെത്തി കടല്‍ തീരത്തടിയുകയായിരുന്നു.ശ്രീഹരിക്കൊപ്പം കാണാതായ കടക്കരപ്പള്ളി കൊച്ചുകരിയില്‍ കണ്ണന്റെ മകന്‍ വൈശാഖിന്റെ മൃതദേഹം ഇന്നലെ വൈകിട്ട് കണ്ടെത്തിയിരുന്നു.
വ്യാഴാഴ്ച വൈകിട്ടാണ് കൂട്ടുകാര്‍ക്കൊപ്പം കടലില്‍ കുളിക്കാനിറങ്ങിയ ഇരുവരെയും തിരയില്‍പ്പെട്ട് കാണാതായത്.വ്യാഴാഴ്ച വൈകിട്ട് അഞ്ചോടെയാണ് ആറ് വിദ്യാര്‍ഥികളടങ്ങിയ സംഘം തീരത്തെത്തിയത്. ഇതില്‍ മൂന്നുപേരാണ് കടലിലിറങ്ങിയത്. വെള്ളത്തില്‍ മുങ്ങിത്താണ ഇവരുടെ നിലവിളി കേട്ട മത്സ്യതൊഴിലാളികള്‍ എത്തി ഒരാളെ രക്ഷപ്പെടുത്തി. അപ്പോഴേക്കും മറ്റ് രണ്ടുപേരും മുങ്ങിതാഴ്ന്നു പോയിരുന്നു.
