കോഴിക്കോട്: നാളെ കര്‍ക്കിടകം ഒന്ന്. ദുര്‍ഘടമായ കാലത്തെ അതിജീവിക്കാന്‍ രാമായണശീലുകള്‍ വായിച്ചും പാടിയും ഭക്തിസാന്ദ്രമായ വഴി തേടുകയാണ് വിശ്വാസികള്‍. ക്ഷേത്രങ്ങളിലും വീടുകളിലും ഇനി ഒരുമാസക്കാലം രാമായണപാരായണം ഉയര്‍ന്നു കേള്‍ക്കാം. തളി ശ്രീരാമക്ഷേത്രത്തില്‍ സി.പി നാരായണ പിഷാരടി രാമായണ പാരായണം നിര്‍വഹിക്കും.
തിരുത്തിയാട് അഴകൊടി ദേവീക്ഷേത്രത്തില്‍ അധ്യാത്മരാമായണം പാരായണം ചെയ്യും. വളയനാട് ദേവീക്ഷേത്രത്തില്‍ പോലൂര്‍ രൂപേഷ് ആര്‍. മാരാര്‍ രാമായണയജ്ഞം നടത്തും. ബിലാത്തിക്കുളം ശിവക്ഷേത്രത്തില്‍ ഗീത കോമളരാജന്‍ വള്ളിക്കുന്ന് വൈകുന്നേരം 5.30 മുതല്‍ 6.30 വരെ രാമായണപാരായണം നടത്തും.
ശ്രീകണ്ഠേശ്വര ക്ഷേത്രത്തില്‍ നാളെ മുതല്‍ ആഗസ്റ്റ് 16 വരെ രാമായണമാസാചരണം നടക്കും.രാമായണ മാസാചരണത്തിന്റെ ഭാഗമായി വിശേഷാല്‍ പൂജകളും ഗണപതിഹോമം, ഭഗവതിസേവ എന്നിവയും ദിവസേന ഉണ്ടാവും.
