ഇടുക്കി: കാട്ടാന ശല്യം തുടര്‍ന്നാല്‍ ആനകളെ വെടിവെച്ചു കൊല്ലുമെന്ന് ഇടുക്കി ഡിസിസി പ്രസിഡന്റ് സിപി മാത്യു. തമിഴ്‌നാട്ടിലും കര്‍ണാടകത്തിലും തിരുനെറ്റിക്ക് വെടിവെയ്ക്കാനറിയുന്ന സുഹൃത്തുക്കള്‍ ഉണ്ട്. നിയമവിരുദ്ധമായിട്ടാണെങ്കിലും അവരെ കൊണ്ടുവന്ന് ആനകളെ വെടിവെച്ച് കൊല്ലുമെന്ന് സിപി മാത്യു പറഞ്ഞു.
കാട്ടാന വിഷയത്തില്‍ സര്‍ക്കാര്‍ ക്രിയാത്മകമായി ഇടപെടുന്നില്ലെന്ന് ആരോപിച്ച് ഇടുക്കി ഡിസിസിയുടെ നേതൃത്വത്തില്‍ കഴിഞ്ഞ ആറു ദിവസമായി പൂപ്പാറയില്‍ തുടരുന്ന നിരാഹാര സമരത്തില്‍ പങ്കെടുത്ത് സംസാരിക്കവെയാണ് സിപി മാത്യുവിന്റെ വിവാദ പ്രസ്താവന. യൂത്ത് കോണ്‍ഗ്രസ് ജില്ലാ പ്രസിഡണ്ട് കെഎസ് അരുണാണ് നിരാഹാരം കിടക്കുന്നത്.
ദൗത്യസംഘം ഇടുക്കിയിലെത്തിയിട്ടുണ്ടെങ്കിലും ചര്‍ച്ചകള്‍ മാത്രമാണ് ഉണ്ടാകുന്നത്. നടപടികളിലേക്ക് കടക്കുന്നില്ലെന്ന് കോണ്‍ഗ്രസ് ആരോപിച്ചു. ആനകളെ പ്രദേശത്തുനിന്ന് മാറ്റി ജനങ്ങളുടെ സുരക്ഷ ഉറപ്പാക്കുന്നതുവരെ അനിശ്ചിതകാല സമരം തുടരുമെന്ന് സിപി മാത്യു പറഞ്ഞു.
