തിരുവനന്തപുരം: നാണംകെട്ട ഓണ്‍ലൈന്‍ റമ്മി പരസ്യങ്ങളില്‍ നിന്ന് മാന്യന്മാരായ വിജയ് യേശുദാസും റിമി ടോമിയും പിന്മാറണമെന്നും ഓണ്‍ലൈന്‍ റമ്മി പരസ്യങ്ങളില്‍ അഭിനയിക്കുന്നതില്‍ നിന്ന് സെലിബ്രിറ്റികളെ പിന്തിരിപ്പിക്കാന്‍ സാംസ്‌കാരിക മന്ത്രിയും സര്‍ക്കാരും ഇടപെടണമെന്നും കെ.ബി. ഗണേഷ് കുമാര്‍ എം.എല്‍.എ.
ഓണ്‍ലൈന്‍ ഗെയിമുകളും ലോണ്‍ ആപ്പുകളും സംബന്ധിച്ച് നിയമസഭയിലുണ്ടായ ചര്‍ച്ചക്കിടെയായിരുന്നു ഗണേഷ് കുമാറിന്റെ പരാമര്‍ശം.
റിമി ടോമി, വിജയ് യേശുദാസ് എന്നിവരാണ് ഇത്തരം ഓണ്‍ലൈന്‍ റമ്മി പരസ്യങ്ങളില്‍ അഭിനയിക്കുന്ന മാന്യന്മാരെന്നും ഇത്തരം ജനദ്രോഹ പരസ്യങ്ങളില്‍ നിന്ന് ഇവരെ പിന്തിരിപ്പിക്കാന്‍ സാംസ്‌കാരിക മന്ത്രി ഇടപെടണമെന്നും ഗണേഷ് കുമാര്‍ നിയമസഭയില്‍ നടത്തിയ പ്രസംഗത്തില്‍ ആവശ്യപ്പെട്ടു.
”നമുക്ക് ലജ്ജ തോന്നുന്ന ഒരു കാര്യം, ഇത്തരം സാമൂഹ്യവിരുദ്ധ- ദ്രോഹ പരസ്യങ്ങളില്‍ നമ്മുടെ ആദരണീയരായ കലാകാരന്മാരും കലാകാരികളും പങ്കെടുക്കുന്നുണ്ട്.
നമ്മുടെയെല്ലാം പ്രിയങ്കരനായ ഗായകന്‍ യേശുദാസിന്റെ മകന്‍ വിജയ് യേശുദാസിനെയും ഗായിക റിമി ടോമി എന്ന കുട്ടിയെയുമൊക്കെ ഇത്തരം പരസ്യങ്ങളില്‍ സ്ഥിരമായി കാണാം.
ഇത്തരം നാണംകെട്ട, ജനദ്രോഹ- രാജ്യദ്രോഹ പരസ്യങ്ങളില്‍ നിന്നും ഈ മാന്യന്മാര്‍ പിന്മാറണം. ഇവര്‍ സാംസ്‌കാരികമായി വലിയ പ്രമാണിമാര്‍ ആണെന്നൊന്നുമല്ല പറഞ്ഞത്. പക്ഷെ ഇവരെ പിന്തിരിപ്പിക്കാന്‍ സാംസ്‌കാരിക മന്ത്രിയും സര്‍ക്കാരും അവരോട് ഈ സഭയുടെ പേരില്‍ ഒന്നഭ്യര്‍ത്ഥിക്കണം,” ഗണേഷ് കുമാര്‍ പറഞ്ഞു.
കൊവിഡ് കാലത്താണ് ഓണ്‍ലൈന്‍ റമ്മികളി സംസ്ഥാനത്ത് സജീവമായത്. ലക്ഷക്കണക്കിനാളുകള്‍ ഭാഗമായ റമ്മി കളിയില്‍ ഓരോ ദിവസവും കോടികളാണ് മറിയുന്നത്.
ഓണ്‍ലൈന്‍ റമ്മി പരസ്യങ്ങളില്‍ അഭിനയിക്കുന്നവരെ നിയമംകൊണ്ട് നിയന്ത്രിക്കാനാവില്ലെന്ന് മന്ത്രി വി.എന്‍. വാസവന്‍ നിയമസഭയില്‍ ഇതിന് മറുപടി പറഞ്ഞു. അഭിനയിക്കുന്നവരുടെ മനസിലാണ് സാംസ്‌കാരിക വിപ്ലവം വരേണ്ടത്. അങ്ങനെ ഉണ്ടായെങ്കിലേ ഇതിനൊരു മാറ്റമുണ്ടാവൂ. താരങ്ങളോട് ഇക്കാര്യം എല്ലാവര്‍ക്കും ചേര്‍ന്ന് അഭ്യര്‍ത്ഥിക്കാമെന്നും വി.എന്‍. വാസവന്‍ കൂട്ടിച്ചേര്‍ത്തു.
അതേസമയം, ഓണ്‍ലൈന്‍ റമ്മിയുടെ പരസ്യത്തില്‍ അഭിനയിക്കുന്ന താരങ്ങള്‍ക്കെതിരെ സമൂഹമാധ്യമങ്ങളില്‍ പ്രതിഷേധം ശക്തമാണ്. ഓണ്‍ലൈന്‍ റമ്മികളി നിരവധിപേരെ ആത്മഹത്യയിലേക്ക് നയിച്ചെന്ന് പരാതികള്‍ ഉയര്‍ന്നതോടെയാണ് പ്രചാരകരാവുന്ന നടീ നടന്മാര്‍ക്കെതിരെ പ്രതിഷേധമുയരുന്നത്
ഓണ്‍ലൈന്‍ റമ്മികളിയുടെ പ്രചാരകരാവുന്നതില്‍ നിന്ന് താരങ്ങള്‍ പിന്മാറണമെന്നാണ് വിമര്‍ശകര്‍ ഉന്നയിക്കുന്ന പ്രധാന ആവശ്യം. ഇവര്‍ക്കെതിരെ ബഹിഷ്‌കരണ ക്യാമ്പയിനുകളും സമൂഹ മാധ്യമങ്ങളില്‍ സജീവമാണ്.പണംവെച്ചുള്ള ഓണ്‍ലൈന്‍ റമ്മികളി വീണ്ടും നിരോധിക്കാന്‍ സര്‍ക്കാര്‍ നിയമ ഭേദഗതിക്ക് നടപടികളാരംഭിച്ചിട്ടുണ്ട്.
