റിഫ മെഹ്്്നുവിന്റെ മൃതദേഹം പുറത്തെടുത്ത് പോസ്റ്റ്മോര്‍ട്ടം നടത്തി

കോഴിക്കോട്: ദുബൈയില്‍ ആത്മഹത്യ ചെയ്ത നിലയില്‍ കണ്ടെത്തിയ യൂട്യൂബര്‍ റിഫ മെഹ്്നുവിന്റെ മൃതദേഹം പുറത്തെടുത്ത് പോസ്റ്റ്മോര്‍ട്ടം നടത്തി. ഫോറന്‍സിക് വിഭാഗത്തിലെ ഡോ. സുജിത്തിന്റെ നേതൃത്വത്തില്‍ മൂന്നുപേര്‍ അടങ്ങുന്ന ഫോറന്‍സിക് സംഘമാണ് പോസ്റ്റ്‌മോര്‍ട്ടം നടത്തിയത്. പാവണ്ടൂര്‍ ജുമാ മസ്ജിദ് കബര്‍സ്ഥാനിലാണ് കബറടക്കം നടന്നിരുന്നത്. ഇവിടെ പോസ്റ്റ്‌മോര്‍ട്ടത്തിനായി സൗകര്യമൊരുക്കുകയായിരുന്നു. താമരശ്ശേരി ഡിവൈ.എസ്.പി ടി.കെ അഷ്റഫിന്റെ നേതൃത്വത്തില്‍ പൊലീസ് സംഘം സ്ഥലത്തെത്തിയിരുന്നു. റിഫയുടെ മരണവുമായി ബന്ധപ്പെട്ട് ഭര്‍ത്താവ് മെഹ്്നാസിനെതിരെ കാക്കൂര്‍ പൊലീസ് കേസെടുത്തിരുന്നു. റിഫയുടെ മരണത്തില്‍ ദുരൂഹത ആരോപിച്ച് ബന്ധുക്കള്‍ റൂറല്‍ എസ്.പിക്ക് പരാതി നല്‍കിയിരുന്നു. അതിന്റെ അടിസ്ഥാനത്തിലാണ് കേസെടുത്തത്. ദുബൈയില്‍ മരിച്ച റിഫയുടെ മൃതദേഹം അവിടെ പോസ്റ്റ്മോര്‍ട്ടം നടത്തിയെന്നാണ് മെഹ്്നാസ് പറഞ്ഞിരുന്നത്. ഇത് കളവാണെന്ന് ബന്ധുക്കള്‍ പറയുന്നു. ഇതേതുടര്‍ന്നാണ് മൃതദേഹം പുറത്തെടുത്ത് പോസ്റ്റ്മോര്‍ട്ടം നടത്താന്‍ അന്വേഷണോദ്യോഗസ്ഥന്മാര്‍ തീരുമാനിച്ചത്. പോസ്റ്റ്‌മോര്‍ട്ടം നടത്തണമെന്ന് റിഫയുടെ മാതാവ് ആവശ്യപ്പെട്ടിരുന്നു.
മാര്‍ച്ച് ഒന്നിന് രാത്രിയാണ് ദുബൈയിലെ ഫ്ളാറ്റില്‍ റിഫയെ ആത്മഹത്യ ചെയ്തനിലയില്‍ കണ്ടെത്തിയത്. സുഹൃത്തിനൊപ്പം പുറത്തുപോയി തിരിച്ചുവന്നപ്പോള്‍ റിഫ മരിച്ചുകിടക്കുന്നതായി കണ്ടു എന്നാണ് ഭര്‍ത്താവ് മെഹ്്നാസ് പറഞ്ഞിരുന്നത്. ജനുവരി അവസാനമാണ് റിഫ ദുബൈയില്‍ എത്തിയത്.
ആത്മഹത്യ ചെയ്യേണ്ട സാഹചര്യമില്ലെന്നാണ് റിഫയുടെ ബന്ധുക്കള്‍ പറയുന്നത്. മരിക്കുന്ന ദിവസം അരമണിക്കൂര്‍ സമയം റിഫ വീഡിയോ കോളിലൂടെ വീട്ടുകാരുമായി സംസാരിച്ചിരുന്നു. ഭര്‍ത്താവ് മെഹ്്സിനെ ഇതുവരെ ചോദ്യം ചെയ്യാന്‍ കഴിഞ്ഞിട്ടില്ല.