കോഴിക്കോട്: ഉപഭോക്തൃ അവകാശ സംരക്ഷണത്തെക്കുറിച്ച് പൊതുജനങ്ങളില്‍ അവബോധം സൃഷ്ടിക്കുന്നതിനുള്ള നടപടികള്‍ സ്വീകരിക്കണമെന്ന് ജില്ലാ കലക്ടര്‍ ഡോ. എന്‍.തേജ് ലോഹിത് റെഡ്ഢി. കലക്ടറേറ്റ് കോണ്‍ഫറന്‍സ് ഹാളില്‍ ചേര്‍ന്ന ജില്ലാ ഉപഭോക്തൃ സംരക്ഷണ സമിതി യോഗത്തില്‍ സംസാരിക്കുകയായിരുന്നു അദ്ദേഹം. ഉപഭോക്താക്കളുടെ അവകാശങ്ങളെക്കുറിച്ച് ബോധവത്കരണം നല്‍കുന്നതിനുള്ള പരിപാടികള്‍ സംഘടിപ്പിക്കാന്‍ നിര്‍ദ്ദേശം നല്‍കി.
ഓണത്തോടനുബന്ധിച്ചു പരിശോധനകള്‍ ശക്തമാക്കും. മീഡിയേഷന്‍ സെന്ററിന്റെ പ്രവര്‍ത്തനം ആരംഭിക്കുന്നതിനുള്ള നടപടികള്‍ സ്വീകരിക്കാന്‍ കലക്ടര്‍ അധികൃതര്‍ക്ക് നിര്‍ദ്ദേശം നല്‍കി.
യോഗത്തില്‍ ജില്ലാ സപ്ലൈ ഓഫീസര്‍ കെ.രാജീവ്, ജൂനിയര്‍ സൂപ്രണ്ട് സി.സദാശിവന്‍ എന്നിവര്‍ സംസാരിച്ചു. ഉപഭോക്തൃ സന്നദ്ധ സംഘടനകളുടെയും, ട്രേഡ് യൂണിയന്റെയും, ബന്ധപ്പെട്ട തദ്ദേശ സ്വയംഭരണ സ്ഥാപനങ്ങളുടെയും പ്രതിനിധികളും കൃഷി, വ്യവസായം, നിര്‍മ്മാണം മേഖലകളില്‍ നിന്നുള്ള പ്രതിനിധികളും യോഗത്തില്‍ സംബന്ധിച്ചു.
