തിരുവനന്തപുരം: കെഎസ്ആര്ടിസിയിലെ സിംഗിള് ഡ്യൂട്ടിക്കെതിരെ തൊഴിലാളികള് പ്രഖ്യാപിച്ച അനിശ്ചിതകാല പണിമുടക്കിനെതിരെ ഗതാഗത മന്ത്രി ആന്റണി രാജു. സിംഗിള് ഡ്യൂട്ടി സിസ്റ്റത്തിനെതിരെ പ്രഖ്യാപിച്ചിരിക്കുന്ന സമരം അംഗീകരിക്കാനാവില്ലെന്ന് ആന്റണി രാജു പറഞ്ഞു.
ഒന്നാം തീയതി മുതല് സമരം നടത്തുമെന്ന് ടിഡിഎഫ് സംഘടന നോട്ടീസ് നല്കിയിട്ടുണ്ട്. സമരത്തില് പങ്കെടുക്കുന്ന ആരും അഞ്ചാം തീയതി ശമ്പളം വാങ്ങാമെന്ന് കരുതേണ്ടെന്ന് ആന്റണി രാജു പറഞ്ഞു. സിംഗിള് ഡ്യൂട്ടി സിസ്റ്റം എന്നത് യൂണിയനുകള് നേരത്തെ അംഗീകരിച്ചതാണ്. അതില് നിന്നും ഒരു വിട്ടുവീഴ്ചക്കും സര്ക്കാര് തയ്യാറല്ലെന്നും മന്ത്രി കൂട്ടിച്ചേര്ത്തു.
കെഎസ്ആര്ടിസിയില് 12 മണിക്കൂര് സിംഗിള് ഡ്യൂട്ടിക്കെതിരെ പ്രതിഷേധം കുടപ്പിക്കുകയാണ് തൊഴിലാളികള്. ഒക്ടോബര് ഒന്ന് മുതലാണ് കെഎസ്ആര്ടിസിയിലെ കോണ്ഗ്രസ് അനുകൂല സംഘടനയായ ടിഡിഎഫ് പണിമുടക്ക് തുടങ്ങുന്നത്. ഇതിനായി വര്ക്കിംഗ് പ്രസിഡണ്ട് എം വിന്സെന്റ് എംഎല്എയുടെ നേതൃത്വത്തില് കെഎസ്ആര്ടിസി സിഎംഡിക്ക് പണിമുടക്കിന് നോട്ടീസ് നല്കിയിട്ടുണ്ട്. സിംഗിള് ഡ്യൂട്ടിയില് വിട്ടുവീഴ്ചയില്ലെന്ന് മുഖ്യമന്ത്രി പ്രഖ്യാപിച്ചതിന് പിന്നാലെയാണ് അനിശ്ചിതകാല പണിമുടക്കുമായി തൊഴിലാളികള് രംഗത്തെത്തുന്നത്.
മുഖ്യമന്ത്രിയുമായുള്ള ചര്ചയില് എല്ലാ മാസവും 5 ന് മുമ്പ് ശമ്പളം കിട്ടുമെന്ന ഉറപ്പുള്ളതിനാല് തല്ക്കാലം പണിമുടക്കേണ്ട എന്നാണ് സിഐടിയു, ബിഎംഎസ്, എഐടിയുസി എന്നീ സംഘടനകളുടെ തീരുമാനം.
