കൊച്ചി :നടിയെ ആക്രമിച്ച കേസില് നടന് സിദ്ദിഖിനെ ക്രൈംബ്രാഞ്ച് സംഘം ചോദ്യം ചെയ്തു. കേസിലെ പ്രതി പള്സര് സുനി ജയിലില്നിന്ന് എഴുതിയ രണ്ടാമത്തെ കത്തില് സിദ്ദിഖിന്റെ പേര് പരാമര്ശിച്ചിരുന്നു. ഇതിന്റെ അടിസ്ഥാനത്തിലാണ് ഇന്നലെ ചോദ്യം ചെയ്തത്.
നടിയെ ആക്രമിച്ച കേസിന്റെ തുടരന്വേഷണത്തിന്റെ ഭാഗമായാണ് നടപടി. കേസിലെ സാക്ഷി കൂടിയായ സിദ്ദിഖിനെ മുന്പും ചോദ്യം ചെയ്തിരുന്നു. പള്സര് സുനി എഴുതിയ രണ്ടാമത്തെ കത്ത്, സുനിയുടെ അമ്മ കോടതിയില് നല്കിയിരുന്നു. ‘അമ്മ’യുടെ പ്രസിഡന്റ് സ്ഥാനം കിട്ടാന് വേണ്ടിയാണ് കേസിലെ പ്രതിയായ നടന് ദിലീപിനെ അറസ്റ്റ് ചെയ്തപ്പോള് സിദ്ദിഖ് ഓടിനടന്നതെന്ന് കത്തില് പറയുന്നുണ്ട്.സിദ്ദിഖിന്റെ പേരും കത്തില് പരാമര്ശിച്ചു. സിദ്ദിഖിന്റെ പേര് പരാമര്ശിച്ചതിന്റെ പശ്ചാത്തലം അറിയാനാണ് ചോദ്യം ചെയ്തത്. കൂടാതെ, അടുത്തിടെ ഒരു മാധ്യമത്തിനു നല്കിയ അഭിമുഖത്തില് ദിലീപിനെ പിന്തുണച്ച് സിദ്ദിഖ് സംസാരിച്ചിരുന്നു. അതു കൂടി കണക്കിലെടുത്തായിരുന്നു ചോദ്യം ചെയ്യലെന്ന് അന്വേഷണ സംഘം അറിയിച്ചു.
ദിലീപിന് ഒരു അബദ്ധം പറ്റിയതാണെന്നും, പക്ഷേ എന്നും കൂടെ നില്ക്കുമെന്നും സിദ്ദിഖ് ഒരു ഓണ്ലൈന് മാധ്യമത്തിന് അഭിമുഖം നല്കിയപ്പോള് പറഞ്ഞിരുന്നു. ഇതില് വ്യക്തത വരുത്താന് കൂടിയായിരുന്നു ചോദ്യം ചെയ്യല്.
ആലുവ അന്വര് ആശുപത്രി ഉടമ ഡോ. ഹൈദരാലിയെയും ചോദ്യം ചെയ്തു. പ്രോസിക്യൂഷന് സാക്ഷിയായ ഹൈദരലി വിചാരണഘട്ടത്തില് കൂറുമാറിയിരുന്നു. ദിലീപിന്റെ സഹോദരീഭര്ത്താവ് സുരാജ് സിദ്ദിഖിനെ മൊഴി മാറ്റാന് പ്രേരിപ്പിക്കുന്ന ഓഡിയോ പുറത്ത് വന്നിരുന്നു. ഇന്നലെയാണ് ഇരുവരെയും ചോദ്യം ചെയ്തത്. നേരത്തേ തൃക്കാക്കര ഉപതെരഞ്ഞെടുപ്പ് ദിവസം ‘ആക്രമിക്കപ്പെട്ട നടി തെരഞ്ഞെടുപ്പില് മത്സരിക്കുന്നുണ്ടോ’, എന്ന് ചോദിച്ച് സിദ്ദിഖ് പരിഹസിച്ചത് വലിയ വിവാദമായിരുന്നു.
ദിലീപിന്റെ മറ്റൊരു അടുത്ത സുഹൃത്താണ് ഇന്നലെ ക്രൈംബ്രാഞ്ച് ചോദ്യം ചെയ്യാന് വിളിപ്പിച്ച ആലുവ അന്വര് ആശുപത്രി ഉടമ ഡോ. ഹൈദരാലി. നടി ആക്രമിക്കപ്പെട്ട ദിവസം താന് അന്വര് ആശുപത്രിയില് ചികിത്സയിലായിരുന്നുവെന്നാണ് ദിലീപിന്റെ വാദം. അന്ന് ദിലീപ് ചികിത്സയിലായിരുന്നില്ല എന്ന് ആദ്യം അന്വേഷണസംഘത്തിന് മൊഴി നല്കിയ ഡോ. ഹൈദരാലി പിന്നീട് വിചാരണാഘട്ടത്തില് കൂറുമാറുകയായിരുന്നു. ഹൈദരാലിയോട് മൊഴി മാറ്റിപ്പറയണമെന്ന് ദിലീപിന്റെ മൂത്ത സഹോദരിയുടെ ഭര്ത്താവ് സുരാജ് ആവശ്യപ്പെടുന്ന ഓഡിയോ ക്ലിപ്പുകള് പുറത്തുവന്നിരുന്നതാണ്. എന്നാല് താന് മൊഴി മാറ്റിയിട്ടില്ലെന്നാണ് ഡോ. ഹൈദരാലി പിന്നീട് പല മാധ്യമങ്ങളോടായി പറയുന്നത്.
വിചാരണാഘട്ടത്തില് മാത്രമല്ല, കേസിന്റെ അന്വേഷണഘട്ടത്തിലും താന് ദിലീപ് തന്റെ ആശുപത്രിയില് ചികിത്സയിലായിരുന്നു എന്നാണ് പറഞ്ഞിട്ടുള്ളത്. ഒരു തരത്തിലും താന് മൊഴി മാറ്റിപ്പറഞ്ഞിട്ടില്ലെന്നും ഡോ. ഹൈദരാലി പറയുന്നു.2018ലുണ്ടായ വെള്ളപ്പൊക്കത്തില് ആശുപത്രിയിലെ രേഖകള് നശിച്ച് പോയിരുന്നു. അതിന് ശേഷമാണ് നടിയെ ആക്രമിച്ച കേസില് വിസ്തരിക്കുന്നതിന് വേണ്ടി തന്നെ വിളിപ്പിച്ചത് എന്ന് ഡോ. ഹൈദരലി പറയുന്നു.
