ന്യൂഡല്ഹി: രാജ്യത്ത് ജനസംഖ്യാ നിയന്ത്രണത്തിന് നിയമം കൊണ്ടുവരുമെന്ന് കേന്ദ്രമന്ത്രി പ്രഹ്ലാദ് സിംഗ് പട്ടേല്. ഇതുമായി ബന്ധപ്പെട്ട നിയമ നിര്മാണം ഉടനുണ്ടാകുമെന്നും മന്ത്രി പറഞ്ഞു. ഛത്തീസ്ഗഡിലെ റായ്പൂരില് ഗരീബ് കല്യാണ് സമ്മേളനത്തില് പങ്കെടുക്കുന്നതിനിടെയാണ് മന്ത്രി ഇക്കാര്യം പറഞ്ഞത്.
ആരും ആശങ്കപ്പെടേണ്ട. ആ നിയമം ഒട്ടും വൈകാതെ വരും. അത്തരം ശക്തമായ വലിയ തീരുമാനങ്ങള് നേരത്തേ എടുത്തിട്ടുണ്ട്. പുതിയ തീരുമാനങ്ങളും ഉടന് വരുമെന്നും മന്ത്രി കൂട്ടിച്ചേര്ത്തു. ജനസംഖ്യാ നിയന്ത്രണം സംബന്ധിച്ച ചോദ്യങ്ങള്ക്ക് മറുപടിയായിട്ടാണ് അദ്ദേഹം ഇക്കാര്യം പറഞ്ഞത്.
ഛത്തീസ്ഗഡിലെ കോണ്ഗ്രസ് സര്ക്കാരിനെയും മന്ത്രി രൂക്ഷമായി വിമര്ശിച്ചു. പല കേന്ദ്ര പദ്ധതികളും സംസ്ഥാന സര്ക്കാര് ഫലപ്രദമായി ഉപയോഗപ്പെടുത്തുന്നില്ല എന്നും അദ്ദേഹം കുറ്റപ്പെടുത്തി.
കഴിഞ്ഞ ഏപ്രിലില്, ജനസംഖ്യാ നിയന്ത്രണം സംബന്ധിച്ച ബില് രാജ്യസഭയില് ബിജെപി എംപി രാകേഷ് സിന്ഹ കൊണ്ടുവന്നിരുന്നു. എന്നാല് അന്ന് ഇത്തരമൊരു നിയമം പരിഗണിക്കുന്നില്ലെന്നാണ് കേന്ദ്ര ആരോഗ്യ മന്ത്രി മന്സുഖ് മാണ്ഡവ്യ പറഞ്ഞത്. നിര്ബന്ധിച്ചുള്ള ജനസംഖ്യാ നിയന്ത്രണം കൊണ്ടുവരില്ല. പകരം ബോധവല്ക്കരണത്തിലൂടെ ആയിരിക്കും നടപടി സ്വീകരിക്കുക എന്നായിരുന്നു അന്ന് മന്ത്രി പറഞ്ഞത്.
