ന്യൂഡല്ഹി: എന്ഡിഎയുടെ രാഷ്ട്രപതി സ്ഥാനാര്ത്ഥിയായ ദ്രൗപതി മുര്മു നാമനിര്ദ്ദേശ പത്രിക സമര്പ്പിച്ചു. പ്രധാനമന്ത്രി നരേന്ദ്ര മോദി, ആഭ്യന്തരമന്ത്രി അമിത് ഷാ തുടങ്ങിയവര്ക്കൊപ്പമാണ് ദ്രൗപതി മുര്മു പത്രികാ സമര്പ്പിക്കാനെത്തിയത്. സഖ്യകക്ഷി നേതാക്കള്ക്കൊപ്പം ബിജു ജനതാദള്, വൈഎസ്ആര്സിപി തുടങ്ങിയ പാര്ട്ടികളില് നിന്നും പ്രതിനിധികളുണ്ടായിരുന്നു.
പത്രികാ സമര്പ്പണത്തിന് മുന്നോടിയായി ഇന്നലെ ഡല്ഹിയിലെത്തിയ മുര്മു പ്രധാനമന്ത്രി നരേന്ദ്ര മോദി, ഉപരാഷ്ട്രപതി വെങ്കയ്യ നായിഡു, അമിത് ഷാ, രാജ്നാഥ് സിംഗ്, ജെ പി നദ്ദ തുടങ്ങിയവരുമായി കൂടിക്കാഴ്ച നടത്തിയിരുന്നു.
അടിസ്ഥാനവര്ഗ്ഗത്തിന്റെ പ്രശ്നങ്ങളെ കുറിച്ചും, രാജ്യത്തിന്റെ വികസനത്തിനെ കുറിച്ചും കൃത്യമായ കാഴ്ച്ചപ്പാടുള്ള നേതാവാണ് മുര്മ്മുവെന്നാണ് കൂടിക്കാഴ്ചയ്ക്ക് ശേഷം പ്രധാനമന്ത്രി നരേന്ദ്രമോദി ട്വിറ്ററില് കുറിച്ചത്. നിതീഷ് കുമാറിന്റെ ജെഡിയുവും ഒഡീഷ മുഖ്യമന്ത്രി നവീന് പട്നായികും കൂടി പിന്തുണ അറിയിച്ചതോടെ അനായാസ വിജയം ഉറപ്പാക്കിയിരിക്കുകയാണ് എന്ഡിഎയുടെ രാഷ്ട്രപതി സ്ഥാനാര്ത്ഥി ദ്രൗപദി മുര്മു.
ഒഡിഷയില് നിന്നുള്ള ആദിവാസി വനിതാ നേതാവാണ് ദ്രൗപതി മുര്മു. ബിജെപിയിലൂടെയാണ് രാഷ്ട്രീയ പ്രവര്ത്തനം തുടങ്ങുന്നത്. കൗണ്സിലറായാണ് ദ്രൗപതി തന്റെ രാഷ്ട്രീയ ജീവിതം ആരംഭിക്കുന്നത്. പിന്നീട് റൈരംഗ്പൂര് ദേശീയ ഉപദേശക സമിതിയുടെ വൈസ് ചെയര്പേഴ്സണായി. 2013ല് ഒഡീഷയിലെ പാര്ട്ടിയുടെ പട്ടികവര്ഗ മോര്ച്ചയുടെ ദേശീയ എക്സിക്യൂട്ടീവ് അംഗമായി തെരഞ്ഞെടുക്കപ്പെട്ടു.
2000ത്തിലാണ് ദ്രൗപതി മുര്മു ഒഡീഷ നിയമസഭയിലേക്ക് ബിജെപി ടിക്കറ്റില് മത്സരിച്ച് ജയിക്കുന്നത്. റെയ്റാങ്പുര് മണ്ഡലത്തില് നിന്നാണ് എംഎല്എയായി ജയിച്ചത്. തുടര്ച്ചയായി രണ്ട് തവണ എംഎല്എയായി. 2000ത്തില് ആദ്യവട്ടം എംഎല്എയായപ്പോള് തന്നെ മന്ത്രിപദം തേടിയെത്തി. 2015ല് ദ്രൗപതിയെ ജാര്ഖണ്ഡിന്റെ ഗവര്ണറായി നിയമിച്ചു. ജാര്ഖണ്ഡില് അഞ്ച് വര്ഷം പൂര്ത്തിയാക്കുന്ന ആദ്യ ഗവര്ണറായി ദ്രൗപതി മുര്മു മാറി. ജാര്ഖണ്ഡിന്റെ ആദ്യ വനിതാ ഗവര്ണര് എന്ന പ്രത്യേകതയും ദ്രൗപതി മുര്മുവിന് തന്നെ.
1958 ജൂണ് 20നാണ് മയൂര്ഭഞ്ച് ജില്ലയിലെ ബൈദാപോസി ഗ്രാമത്തില് ആണ് ദ്രൗപതി മുര്മു ജനിച്ചത്. ബിരാഞ്ചി നാരായണ് തുഡുവാണ് പിതാവ്. ആദിവാസി വിഭാഗമായ സാന്താള് കുടുംബത്തിലായിരുന്നു ജനനം. രമാദേവി വിമന്സ് യൂണിവേഴ്സിറ്റിയിലായിരുന്നു വിദ്യാഭ്യാസം. ശ്യാംചരണ് മുര്മുവിനെ വിവാഹം ചെയ്തു. ഈ ബന്ധത്തില് രണ്ടാണ്മക്കളും ഒരു പെണ്കുട്ടിയുമുണ്ട്. എന്നാല് ഭര്ത്താവും രണ്ടാണ്കുട്ടികളും മരിച്ചു.
