പത്തനംതിട്ട: ‘ആസാദ് കശ്മീര് ‘ പരാമര്ശത്തില് മുന് മന്ത്രി കെ.ടി.ജലീലിനെതിരെ തിരുവല്ല കോടതിയില് ഹര്ജി. ആര്എസ്എസ് ജില്ലാ പ്രചാര് പ്രമുഖ് അരുണ് മോഹന് ആണ് കോടതിയെ സമീപിച്ചത്. തിരുവല്ല ജുഡീഷ്യല് ഒന്നാം ക്ലാസ് മജിസ്ട്രേറ്റ് കോടതി ഹര്ജി ഫയലില് സ്വീകരിച്ചു. ഹര്ജി ചൊവ്വാഴ്ച പരിഗണിക്കും. ജലീലിന്റെ ഫേസ്ബുക്ക് പോസ്റ്റിനെതിരെ അരുണ് മോഹന് പൊലീസിനെ സമീപിച്ചിരുന്നു. ഇതില് തുടര്നടപടികള് ഉണ്ടാകാത്തതിനെ തുടര്ന്നാണ് കോടതിയെ സമീപിച്ചത്.
കശ്മീര് സന്ദര്ശിച്ചതിന് ശേഷം ഫേസ്ബുക്കില് കെ.ടി.ജലീല് പ്രസിദ്ധീകരിച്ച പോസ്റ്റിലെ പരമാര്ശങ്ങള് നേരത്തെ വന് വിവാദമായിരുന്നു. ‘പാക്ക് അധീന കശ്മീര്’ എന്ന് ഇന്ത്യ വിശേഷിപ്പിക്കുന്ന പ്രദേശത്തെ ‘ആസാദ് കശ്മീര്’ എന്ന് ഫേസ്ബുക്ക് പോസ്റ്റില് ജലീല് വിശേഷിപ്പിച്ചതാണ് വിവാദമായത്.. വിഭജനകാലത്ത് കശ്മീര് രണ്ടായി വിഭജിച്ചിരുന്നു എന്നായിരുന്നു ജലീലിന്റെ മറ്റൊരു പരാമര്ശം.
ആദ്യം ന്യായീകരിച്ചെങ്കിലും വിവാദങ്ങള് കടുത്തതോടെ ഫേസ്ബുക്ക് പോസ്റ്റ് പിന്വലിക്കുകയാണെന്ന് ജലീല് വ്യക്തമാക്കി. താന് ഉദ്ദേശിച്ചതിന് വിരുദ്ധമായി പ്രസ്തുത കുറിപ്പിലെ വരികള് ദുര്വ്യാഖ്യാനം ചെയ്യപ്പെട്ടു. ഈ സാഹചര്യത്തില് നാടിന്റെ നന്മയ്ക്കും ജനങ്ങള്ക്കിടയിലെ സൗഹൃദം ഊട്ടിയുറപ്പിക്കുന്നതിനും ഫേസ്ബുക്ക് പോസ്റ്റ് പിന്വലിച്ചതായി അറിയിക്കുന്നുവെന്നായിരുന്നു കെ.ടി.ജലീലിന്റെ വിശദീകരണം. എന്നാല് സിപിഎം നിര്ദ്ദേശത്തെ തുടര്ന്നാണ് ജലീല് പോസ്റ്റ് പിന്വലിച്ചത്. എം.വി.ഗോവിന്ദനടക്കമുള്ള രണ്ട് മന്ത്രിമാര് കെ.ടി.ജലീലിന്റെ പരാമര്ശത്തോട് പാര്ട്ടിക്ക് യോജിപ്പില്ലെന്ന് വ്യക്തമാക്കിയിരുന്നു.
ജലീലിനെതിരെ കേസെടുക്കണമെന്ന് ആവശ്യപ്പെട്ട് അഭിഭാഷകനായ ജി.എസ്.മണി ദില്ലിയില് പരാതി നല്കിയിരുന്നു. ഡല്ഹി തിലക്മാര്ഗ് പൊലീസ് സ്റ്റേഷനില് നല്കിയ ഈ പരാതിയില് കേസ് എടുത്തില്ലെന്ന് ആവശ്യപ്പെട്ട് ഡല്ഹി ഡിസിപിക്കും അഡ്വ. ജി.എസ്.മണി, പരാതി നല്കിയിട്ടുണ്ട്.
